រដ្ឋមន្រ្តីក្រសួងឧស្សាហកម្មចុះទស្សនកិច្ចរោងចក្រចោមចៅ

កាលពីថ្ងៃព្រហស្បតិ៍ ទី១៩ ខែកុម្ភៈ កន្លងទៅនេះ ក្នុងឱកាសទស្សនកិច្ចខ្សែសង្វាក់ផលិតកម្មរបស់ក្រុមហ៊ុន និងមន្ទីរពិសោធន៍ Labiocert នៅសង្កាត់ចោមចៅ រាជធានីភ្នំពេញ ឯកឧត្តមហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកទេស និងនវានុវត្តន៍ បានសម្តែងការកោតសរសើរដល់ក្រុមហ៊ុនសហគ្រាសប៉េប៉េអឹម-ខនហ្វីរេលថាជាគំរូមួយនៃការធ្វើទំនើបកម្មផ្នែកឧស្សាហកម្មដោយផ្អែកលើចំណេះជំនាញកសិកម្មខ្មែរ។

ដំណើរទស្សនកិច្ចដើម្បីវាយតម្លៃសក្តានុពលនៃវិស័យឧស្សាហកម្ម

អមដំណើរដោយមន្ត្រីបច្ចេកទេសមកពីក្រសួង (នាយកដ្ឋានឧស្សាហកម្ម នាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ មន្ទីរពិសោធន៍ជាតិ នាយកដ្ឋានសហគ្រាសធុនតូច និងមធ្យម និងសិប្បកម្ម និង​មជ្ឈមណ្ឌលមាត្រាសាស្រ្តជាតិ។ លោករដ្ឋមន្ត្រីបានចុះទស្សនកិច្ចដើម្បីវាយតម្លៃលើវឌ្ឍនភាពរបស់វិស័យឯកជន និងស្តាប់ពីតម្រូវការរបស់ពួកគេ ដើម្បីគាំទ្រដល់ការអភិវឌ្ឍន៍ផលិតផលក្នុងស្រុកឱ្យបានកាន់តែប្រសើរឡើង។

ខនហ្វីរេល : ប្រែក្លាយពីដើមត្នោត «ដើមឈើរបស់ប្រជាជនក្រីក្រ» ទៅជាវិស័យដ៏ជោគជ័យមួយ

នៅក្នុងបទបង្ហាញរបស់លោក លោកឧកញ៉ាឱសថបណ្ឌិតហៃ លីអ៊ាង បានរម្លឹកថា បេសកកម្មរបស់ក្រុមហ៊ុនខនហ្វីរេលគឺធ្វើឱ្យផលិតផលដូនតាក្លាយជាកម្លាំងចលករនៃឧស្សាហកម្មជាតិទំនើប ដោយចាប់ផ្តើមជាមួយស្ករត្នោតម៉ាក Thnot។

លោកឧកញ៉ាឱសថបណ្ឌិតគូសបញ្ជាក់យ៉ាងដូច្នេះ៖ «យើងបានចាប់ផ្តើមជាមួយដើមត្នោត ដែលជាដើមឈើតំណាងឱ្យប្រទេសរបស់យើង។ ពីមុនធ្លាប់ត្រូវបានគេចាត់ទុកថាជាដើមឈើរបស់អ្នកក្រ ឥឡូវវាអាចក្លាយជាដើមឈើរបស់អ្នកមាន»។ លោករម្លឹកផងដែរថា ស្ករត្នោតរបស់ក្រុមហ៊ុនខនហ្វីរេលទទួលបានមេដាយមាសនៅឯពិព័រណ៍ Nat-Expo ២០០៥ នៅទីក្រុងប៉ារីស និងទទួលបានពានរង្វាន់ពីពានរង្វាន់ Great Taste Awards និងត្រូវចុះផ្សាយនៅក្នុងសៀវភៅមគ្គទេសក៍ Guide de Michelin។

លោកបានឱ្យដឹងទៀតថា តម្លៃសក្តានុពលនៃវត្ថុធាតុដើមត្នោតគឺមាន​ជាង ៦០០ លានដុល្លារ ប៉ុន្តែរហូតមកដល់បច្ចុប្បន្ន គេអាចរកបានតែប្រាំលានដុល្លារប៉ុណ្ណោះ ដោយសារតែខ្វះអ្នកផលិតគ្រប់គ្រាន់ និងដោយសារតែភាពលំបាក និងហានិភ័យនៃមុខរបរឡើងត្នោតនេះ។

ដើម្បីធានាសុវត្ថិភាព និងសម្រួលដល់ការងាររបស់អ្នកឡើងត្នោត ក្រុមហ៊ុនខនហ្វីរេលកំពុងអភិវឌ្ឍគម្រោង «ម៉ូតូត្នោត» (ម៉ូទ័រសម្រាប់ឡើងដើមត្នោត) ដែលត្រូវបានរចនាឡើងដើម្បីបង្កើនផលិតភាព និងសុវត្ថិភាព ជាគម្រោងមួយដែលលោកឧកញ៉ាឱសថបណ្ឌិតហៃ លីអ៊ាង បានស្វែងរកការគាំទ្រពីក្រសួង ដោយសារទីផ្សារកំពុងស្ថិតក្នុងស្ថានភាពតម្រូវការលើសពីការផ្គត់ផ្គង់រួចទៅហើយ។

លោកក៏បានសង្កត់ធ្ងន់លើតម្រូវការក្នុងការកែលម្អផលិតកម្មម្រេច ជាពិសេសម្រេចមកពីខេត្តកំពត មណ្ឌលគីរី កំពង់ចាម និងកំពង់ធំ ដើម្បីបំពេញតម្រូវការទីផ្សារអន្តរជាតិដ៏ខ្លាំងក្លា ដោយអំពាវនាវឱ្យមានការគាំទ្របច្ចេកទេសពីរដ្ឋ ដើម្បីបញ្ចូលបច្ចេកវិទ្យាថ្មីៗឱ្យបានកាន់តែឆាប់រហ័ស។

Labiocert នឹងក្លាយជាមន្ទីរពិសោធន៍គំរូនៅថ្ងៃអនាគត

ដំបូងឡើយ ដើម្បីឆ្លើយតបទៅនឹងតម្រូវការផ្ទៃក្នុងរបស់ក្រុមហ៊ុនសហគ្រាសប៉េប៉េអឹម-ខនហ្វីរេល មន្ទីរពិសោធន៍ Labiocert ត្រូវបានបង្កើតឡើងដើម្បីបំពេញតាមស្តង់ដារអន្តរជាតិ និងធានាគុណភាព និងសុវត្ថិភាពនៃផលិតផលរបស់ក្រុមហ៊ុនសហគ្រាស ទន្ទឹមគ្នានេះដែរគឺដើម្បីផ្តល់ទំនុកចិត្តដល់អ្នកប្រើប្រាស់បរទេស។

ជាមួយនឹងការធ្វើទំនើបកម្មឧបករណ៍ និងធនធានមនុស្សរបស់ខ្លួន មន្ទីរពិសោធន៍ Labiocert ឥឡូវនេះកំពុងរៀបចំឯកសារដើម្បីទទួលបានវិញ្ញាបនបត្រ ISO ដែលជាជំហានដំបូងដើម្បីផ្តល់សេវាកម្មត្រួតពិនិត្យគុណភាពរបស់ខ្លួនយ៉ាងទូលំទូលាយសម្រាប់ក្រុមហ៊ុនក្នុងស្រុក។

ឯកឧត្តមរដ្ឋមន្ត្រី ហែម វណ្ណឌី បានលើកទឹកចិត្តមន្ទីរពិសោធន៍ឱ្យដាក់ពាក្យសុំវិញ្ញាបនបត្រ « Accreditation Body » ដែលទទួលស្គាល់ដោយក្រសួង ដើម្បីឱ្យក្លាយជាមន្ទីរពិសោធន៍គំរូផ្លូវការសម្រាប់ការវិភាគអាហារ។

លោក​មានប្រសាសន៍​ថា៖ «យើង​ត្រូវការ​មន្ទីរពិសោធន៍​គំរូជា​ផ្លូវការ។ ប្រសិនបើមន្ទីរពិសោធន៍ Labiocert ទទួលបាន​វិញ្ញាបនបត្រ ISO ​យើង​ដាក់ពាក្យ​ស្នើសុំ​រួមគ្នា​ដើម្បី​ឱ្យមន្ទីរពិសោធន៍នេះ​ក្លាយជា​មន្ទីរពិសោធន៍​ផ្លូវការ»។ លោក​បន្តទៀតថា ក្រុមហ៊ុន​ទាំងអស់​អាចផ្ញើ​​ផលិតផលរបស់ខ្លួនដើម្បីឱ្យមន្ទីរពិសោធន៍ដែល​ទទួលស្គាល់​ដោយ​រដ្ឋ​នេះធ្វើការវិភាគ។

ទីផ្សារអន្តរជាតិ និងឧបសគ្គរដ្ឋបាល

ក្រុមហ៊ុនខនហ្វីរេលបាននាំចេញទៅកាន់ទីផ្សារដែលមានអំណាចទិញខ្ពស់ដូចជា ប្រទេសជប៉ុន កូរ៉េខាងត្បូង បារាំង និងវៀតណាម ដែលតំណាងឱ្យសក្តានុពលរបស់អ្នកប្រើប្រាស់ជាងប្រាំរយលាននាក់ នូវផលិតផលដែលទទួលបានអត្ថប្រយោជន៍ពីវិញ្ញាបនបត្រអន្តរជាតិ ជាពិសេសលើផលិតផលប្រហុករបស់ក្រុមហ៊ុន។

ត្រូវបានសង្កេតដោយដៃគូជប៉ុនចាប់តាំងពីឆ្នាំ២០២២មក ក្រុមហ៊ុនបានចុះហត្ថលេខានៅឆ្នាំ២០២៥លើកិច្ចព្រមព្រៀងចែកចាយនៅកន្លែងលក់ចំនួន៧០កន្លែងនៅក្នុងប្រទេសជប៉ុន និងកំណត់គោលដៅចំនួន៤០០ទីតាំងនៅឆ្នាំនេះ ក្នុងនោះ៥០កន្លែងគឺនៅក្នុងមជ្ឈមណ្ឌលផ្សារទំនើប AEON។

លោកឧកញ៉ាឱសថបណ្ឌិតហៃ លីអ៊ាង បានបង្ហាញពីសក្តានុពលនេះដោយលើកឡើងពីទីផ្សារភីហ្សានៅលើសកលលោក ដែលត្រូវបានប៉ាន់ប្រមាណថាមានចំនួន ២,៤ ពាន់លានកន្លែង ដែលមិនទាន់មានលក់ «ភីហ្សាប្រហុក» នៅឡើយទេ៖ ការចាប់យកចំណែក​ទីផ្សារនេះត្រឹម​តែ ០,០០១ ភាគរយក៏អាចនឹងនាំមកនូវប្រាក់ចំណូលយ៉ាងច្រើន និងមាននិរន្តរភាពដល់ប្រទេសកម្ពុជា ដោយ​យើង​គ្រាន់តែ រួម​គ្នា​ការពារប្រព័ន្ធអេកូឡូស៊ីទនៃ​ន្លេសាប ដែលអាចចាត់ទុកថាជា «រោងចក្របៃតងដ៏ធំមហិមា»។

ប៉ុន្តែ លោកបានរិះគន់ចំពោះរបាំងរដ្ឋបាលដែលរារាំងការនាំចេញ ដោយប្រៀបធៀបស្ថានភាពទៅនឹងការធ្វើដំណើររបស់មនុស្សថា «មនុស្សម្នាក់ដែលមានលិខិតឆ្លងដែន និងទិដ្ឋាការអាចធ្វើដំណើរបានហើយ​។ ប៉ុន្តែសម្រាប់ថ្នាំពេទ្យ ទាមទារឱ្យមានការសុំអនុញ្ញាត សូម្បីតែមាន​ការបញ្ជាទិញរួច​ហើយ​ក៏ដោយ»។

ប្រឈមមុខនឹងតម្រូវការផ្នែករដ្ឋបាលកាន់តែស្មុគស្មាញ លោកបានអំពាវនាវឱ្យក្រសួងបន្ទន់ឥរិយាបថក្នុងការសម្របខ្លួនទៅនឹងការវិវត្តន៍យ៉ាងឆាប់រហ័សនៃទីផ្សារពិភពលោក ដោយសង្ឃឹមថា «រដ្ឋ និងវិស័យឯកជនត្រូវយល់គ្នាទៅវិញទៅមកឱ្យកាន់តែច្បាស់»។

ឯកឧត្តមរដ្ឋមន្ត្រី​សរសើរ​គំរូ​នៃ​ទំនើបកម្មផ្នែក​ឧស្សាហកម្ម

នៅចុងបញ្ចប់នៃបទបង្ហាញ ឯកឧត្តម ហែម វណ្ណឌី បានសម្តែងការកោតសរសើរចំពោះចក្ខុវិស័យរបស់ក្រុមហ៊ុនខនហ្វីរេលដែលបានផ្សារភ្ជាប់បេតិកភណ្ឌដូនតាទៅនឹងកេរ្តិ៍ឈ្មោះរបស់ប្រទេស និងតម្រូវការផ្នែកគុណភាព។

លោកបានរម្លឹកថា ផែនការរបស់រាជរដ្ឋាភិបាលសម្រាប់អាណត្តិទី៧ បានដាក់ការធ្វើទំនើបកម្មលើវិស័យឧស្សាហកម្មជាចំណុចស្នូលនៃយុទ្ធសាស្ត្រ មិនត្រឹមតែតាមរយៈម៉ាស៊ីនប៉ុណ្ណោះទេ ប៉ុន្តែថែមទាំងតាមរយៈការបណ្តុះបណ្តាលវិជ្ជាជីវៈ បច្ចេកវិទ្យា និងការបង្កើនផលិតភាព ដើម្បីជួយសម្រួលដល់វិស័យកសិកម្មផងដែរ។

លោក​​មានប្រសាសន៍​ថា «ការ​ធ្វើ​ទំនើបកម្មលើវិស័យឧស្សាហកម្ម​គឺជា​បេសកកម្ម​ដ៏​សំខាន់​មួយ​របស់​ក្រសួង​ ហើយ​ខ្ញុំ​មាន​សេចក្តីសោមនស្ស​រីករាយ​ដែល​បាន​ឃើញ​ក្រុមហ៊ុនមួយរបស់​ខ្មែរ​​ចូល​រួម​ចំណែក​ដល់​កំណើន​សេដ្ឋកិច្ច​នៃ​វិស័យ​នេះ»។ លោកក៏បាន​លើកទឹកចិត្ត​ដល់​ក្រុមហ៊ុនសហគ្រាសប៉េប៉េអឹម-ខនហ្វីរេលក្នុង​គម្រោង​វិនិយោគ​របស់​ខ្លួនផងដែរ។

សម្រាប់​លោក ដើម្បីឈានទៅដល់ការពង្រីកខ្លួនដូចក្រុមហ៊ុនសហគ្រាសប៉េប៉េអឹម-ខនហ្វីរេល ទាមទារ​ឱ្យមានការគាំទ្រ​សម្រាប់​អាជីវកម្ម​ខ្នាតតូច​នៅក្នុង​ខ្សែសង្វាក់​តម្លៃ ដើម្បី​រៀបចំ​រចនាសម្ព័ន្ធ​បណ្តាញ​អ្នកផ្គត់ផ្គង់ និង​ពង្រឹង​ការបង្កើត​តម្លៃបន្ថែម។

ទាក់ទងនឹងគម្រោង «ម៉ូតូត្នោត» លោកបានវាយតម្លៃគំនិតនេះថាមានសក្តានុពល ហើយបានបញ្ជាក់​ថា រដ្ឋលេខាធិការដ្ឋាននៃក្រសួងឧស្សាហកម្មបានត្រៀមខ្លួនរួចជាស្រេចដើម្បីគាំទ្រគម្រោងនេះលើផ្នែកបច្ចេកទេស សុវត្ថិភាព និងនវានុវត្តន៍។

លោករដ្ឋមន្ត្រីបានបញ្ចប់ដោយសំណូមពរឱ្យមន្ទីរពិសោធន៍ Labiocert និងក្រសួងធ្វើការរួមគ្នា ដោយប្រមូលផ្តុំឧបករណ៍ និងជំនាញ ដើម្បីកសាងប្រព័ន្ធគ្រប់គ្រងគុណភាពអាហារថ្នាក់ជាតិដោយមិនចាំបាច់វិនិយោគបន្ថែម។

លោកឧកញ៉ាឱសថបណ្ឌិតបានស្វាគមន៍យ៉ាងរីករាយចំពោះគំនិតផ្តួចផ្តើមនេះ ដោយវាយតម្លៃថា «បន្ទាប់ពីការខិតខំប្រឹងប្រែងអស់រយៈពេលសាមសិបឆ្នាំកន្លងមក ផ្លូវដែលយើងបានដើរត្រូវបានបង្ហាញថាជាផ្លូវត្រឹមត្រូវ» ហើយឥឡូវនេះយើងអាចបន្តដំណើរជាមួយគ្នា៕